भारताच्या क्रीडा इतिहासात एक अभिमानास्पद क्षण पाहायला मिळाला आहे. पहिला खो-खो विश्वचषक १३ जानेवारीपासून नवी दिल्लीतील इंदिरा गांधी इनडोअर स्टेडियमवर सुरू झाला. भारताच्या महिला आणि पुरुष संघांनी २०२५ खो-खो वर्ल्ड कप जिंकून नवा इतिहास रचला आहे. नवी दिल्लीतील इंदिरा गांधी स्टेडियममध्ये झालेल्या या ऐतिहासिक स्पर्धेत भारतीय संघांनी नेपाळला धडाकेबाज पराभव देत पहिला खो-खो वर्ल्ड कप आपल्या नावावर केला. वेग, रणनिती आणि कौशल्याच्या जोरावर भारताच्या महिला संघाने वर्ल्ड कपमध्ये इतिहास रचला. रविवारी झालेल्या अंतिम सामन्यात भारताने नेपाळचा ७८ विरुद्ध ४० अशा फरकाने पराभव करत खो-खो वर्ल्ड कप जिंकला.
विश्वचषक स्पर्धेत सुरुवातीपासूनच टीम इंडियाचा दबदबा स्पष्ट झाला. भारतीय संघासाठी अंतिम सामना टफ असू शकतो, अशी चर्चा होती, कारण नेपाळच्या खो-खो संघालाही खूप अनुभव आणि ताकद आहे. परंतु भारतीय महिलांनी सामन्याच्या प्रत्येक क्षणी आपलं वर्चस्व कायम ठेवले. भारतीय संघाने टर्न १ मध्ये आक्रमकपणे खेळ सुरू केला आणि नेपाळच्या चुकांचा फायदा घेत ३४-० अशा मोठ्या आघाडीने सामन्याची सुरुवात केली. टर्न २ मध्ये नेपाळने आक्रमण करण्याची वेळ साधली आणि त्यांनी आपलं खाते उघडले, पण भारताच्या बचावात माहिर असलेल्या खेळाडूंनी त्यांना सहज गुण मिळवू दिले नाही. त्यामुळे दुसऱ्या टर्ननंतर स्कोअर ३५-२४ असा झाला.
भारतीय महिला संघाने नेपाळचा ७८-४० असा धुव्वा उडवला !
भारतीय महिला संघाने खो-खो वर्ल्ड कपच्या अंतिम सामन्यात नेपाळला एकतर्फी पराभूत करत ३८ गुणांच्या फरकाने विजयी होऊन इतिहास रचला. १९ जानेवारी २०२५ रोजी झालेल्या या ऐतिहासिक सामन्यात भारतीय संघाने नेपाळला ७८-४० अशा मोठ्या फरकाने मात देत आपला विजय सुनिश्चित केला. त्यांच्या जबरदस्त सामरिक खेळाने आणि चांगल्या सहयोगाने भारताने वर्ल्ड कप जिंकून दमदार प्रदर्शन केले.
भारतीय महिला संघाने स्पर्धेच्या पहिल्या सामन्यापासूनच आपलं वर्चस्व प्रस्थापित केले. त्यांनी दक्षिण आफ्रिकेविरुद्ध १७६ पॉइंट्सच्या भव्य फरकाने विजय मिळवून स्पर्धेची जोरदार सुरूवात केली. त्यानंतर, प्रत्येक सामन्यात आपल्या अप्रतिम खेळाने त्यांनी शानदार प्रदर्शन केलं आणि अखेर अंतिम फेरीत स्थान मिळवलं. भारतीय संघाने जिंकलेल्या प्रत्येक सामन्यात एक नवा उत्साह आणि जोश दिसून आला, ज्यामुळे त्यांच्या विजयी घोडदौडीला परिष्कृत आकार मिळाला.
भारतीय पुरुष संघानेही इतिहास रचला !
भारतीय पुरुष संघाने अंतिम सामन्यात नेपाळला ५४-३६ अशा फरकाने पराभव करत विजेतेपद पटकावले. पुरुष संघाने संपूर्ण स्पर्धेत अपराजित राहण्याचा अप्रतिम विक्रम केला. ग्रुप स्टेजमध्ये नेपाळ, पेरू, ब्राझील आणि भूतानवर विजय मिळवून त्यांनी आपलं वर्चस्व प्रस्थापित केलं आणि प्रत्येक सामन्यात आपली ताकद आणि कौशल्य सिद्ध केले. या ऐतिहासिक विजयाने भारतीय पुरुष संघाने एक नवा शिखर गाठला.
भारतीय संघांचे संपूर्ण देशभरातून अभिमानास्पद कौतुक !
भारताच्या दोन्ही संघांनी या ऐतिहासिक विजयाने संपूर्ण देशाचा गौरव वाढवला आहे. भारतीय महिला आणि पुरुष संघांच्या या विजयावर क्रीडा प्रेमींसह विविध नेत्यांनी सोशल मीडियावर आणि ट्विटरवर अभिनंदनाचा वर्षाव केला आहे. “भारतीय महिला आणि पुरुष संघांनी एकाच स्पर्धेत वर्ल्ड कप जिंकून नवा इतिहास रचला आहे. हा विजय भारतीय क्रीडा संस्कृतीसाठी अत्यंत गौरवशाली आहे!” असे खो-खो महासंघाने ट्विटरवर सांगितले. या विजयाने भारतीय क्रीडा क्षेत्रात एक नवा अध्याय सुरू झाला आहे आणि देशभरात उत्साह आणि आनंद आहे.
पंतप्रधान नरेंद्र मोदींनी भारतीय महिला संघाला खो-खो विश्वचषक जिंकण्याबद्दल दिले अभिनंदन !
“पहिल्यांदाच खो-खो विश्वचषक जिंकणाऱ्या भारतीय महिला संघाचे अभिनंदन! हा ऐतिहासिक विजय त्यांच्या अप्रतिम कौशल्य, जिद्द आणि टीमवर्कचा परिणाम आहे. या विजयामुळे भारतातील एक अत्यंत जुना आणि पारंपरिक खेळ अधिक प्रकाशात आला आहे, ज्याने देशभरातील असंख्य तरुण खेळाडूंना प्रेरणा दिली आहे. या यशामुळे भविष्यात अधिक युवकांना या खेळाचा पाठपुरावा करण्याचा मार्ग मोकळा होवो.” असे ट्विट करत पंतप्रधान मोदींनी महिला खो-खो संघाला शुभेच्छा दिल्या.
तसेच, “आजचा दिवस भारतीय खो-खो साठी अत्यंत खास आहे. खो-खो विश्वचषक जिंकल्याबद्दल भारतीय पुरुष संघाला अभिमान आहे. त्यांची जिद्द आणि समर्पण वाखाणण्याजोगी आहे. या विजयामुळे युवकांमध्ये खो-खो खेळाच्या लोकप्रियतेला अधिक चालना मिळणार आहे.” असे ट्विट करत पंतप्रधान मोदींनी पुरुष खो-खो संघाचे देखील अभिनंदन केले.
