दिल्ली विधानसभा निवडणुकीत भारतीय जनता पक्षाने आपली जोरदार कामगिरी दाखवली आहे. भाजपने या निवडणुकीत आम आदमी पक्ष आणि काँग्रेसला चारीमुंड्या चित करत आपला 27 वर्षांचा दुष्काळ संपवला आहे. सत्ताधारी आम आदमी पक्षाला धक्का देत भाजपने विजय मिळवला आहे. दिल्ली विधानसभा निवडणुकीत ७० जागांसाठी मतदान झाले. भाजपने ४८ जागांवर विजय मिळवत आप (आम आदमी पार्टी) चा सूर गळला. सलग दोन वेळा सत्तेत असणाऱ्या आपला केवळ २२ जागांवर समाधान मानावे लागले. यापेक्षा धक्कादायक म्हणजे आप चे मुख्यमंत्री अरविंद केजरीवाल आणि उपमुख्यमंत्री मनीष सिसोदिया यांना सुद्धा पराभवाचा सामना करावा लागला. काँग्रेस आणि इतर पक्षांना एकही जागा जिंकता आलेली नाही, हे आश्चर्यकारक आहे.
दिल्लीमध्ये भाजपचा धडाकेबाज कमबॅक
साधारण दोन महिन्यांपूर्वी दिल्लीतील राजकीय वर्तुळात असे चित्र होते की भाजपच्या जागा वाढतील, पण विजय आणि सत्ता मात्र आम आदमी पक्षाचीच ठरतील. मात्र, गेल्या महिन्यात भाजपने जोरदार कमबॅक करत विधानसभा निवडणुकीत आक्रमक प्रचार केला. भाजपने आम आदमी पक्षाचे प्रमुख नेते अरविंद केजरीवाल आणि मनीष सिसोदिया यांना थेट लक्ष्य केले आणि भ्रष्टाचाराचे आरोप करत त्यांना तुरुंगावारी देखील धडक दिली. यामुळे केजरीवाल यांच्या प्रतिमेला धक्का बसला. त्याचवेळी भाजपने बुथ स्तरावर केलेले मायक्रो प्लॅनिंग देखील प्रभावी ठरले.
एनडीए सरकारचा अर्थसंकल्प: नोकरदारांसाठी दिलासा
काही दिवसांपूर्वी एनडीए सरकारचा वार्षिक अर्थसंकल्प संसदेत मांडला गेला. यामध्ये १२ लाख रुपयांपर्यंतच्या वार्षिक उत्पन्नावर करमुक्ती दिली गेली, ज्यामुळे सामान्य नोकरदारांना मोठा दिलासा मिळाला. या निर्णयामुळे दिल्लीतील सामान्य नोकरदार आणि मध्यमवर्गाने भाजपच्या पारड्यात मोठ्या प्रमाणात मते टाकल्याचे दिसून येत आहे.
भाजपचे शिशमहाल आणि यमुना प्रदूषणावर प्रभावी नरेटिव्ह
भाजपने यंदाच्या दिल्ली निवडणुकीत यमुना नदीच्या प्रदूषण आणि कचऱ्याच्या समस्येवर प्रभावीपणे लक्ष केंद्रित केले. भाजपने अरविंद केजरीवाल यांना “दिल्लीकरांना पाण्यातून विष पाजत आहेत” अशी तीव्र टीका केली. त्याचवेळी, केजरीवाल यांच्या सरकारी निवासस्थानावर कोट्यवधी रुपये खर्च केल्याचा मुद्दा देखील भाजपने मांडला. यामुळे केजरीवालांना उत्तर देण्यास भाग पडले. पंतप्रधान मोदींनी केजरीवालांच्या शिशमहालावर आक्रमकपणे भाष्य करत भाजपच्या प्रचाराला धार दिली. मोदींच्या टीकेमुळे भाजपचे इतर नेतेही आक्रमक झाले, आणि शिशमहाल हा मुद्दा दिल्ली निवडणुकीत चर्चेचा ठरला.
आपच्या गडात भाजपची दणक्यात एन्ट्री
दिल्लीतील मुस्लिम बहुल भागात काँग्रेस आणि आम आदमी पार्टीला मोठे नुकसान सहन करावे लागले. दोन्ही पक्ष वेगवेगळे लढल्यामुळे अनेक जागांवर तिरंगी लढत झाली, ज्याचा थेट फायदा भाजपला झाला. या भागांमध्ये भाजपने बहुतेक जागांवर आघाडी घेतली. असदुद्दीन ओवैसी यांचा एआयएमआयएम पक्ष दिल्लीतील मुस्लिम बहुल भागात भाजपला मागे टाकण्यात अपयशी ठरला.
