कॉमन मॅन’चे प्रत्यक्ष उदाहरण असलेले पर्रिकर प्रत्येकाला आपल्यातलेच एक वाटले. राष्ट्रीय स्वयंसेवक संघाचे स्वयंसेवक, भाजपचे सामान्य कार्यकर्ता, गोव्याचे मुख्यमंत्री आणि अखेर देशाचे संरक्षण मंत्री, अशा यशाच्या शिखरावर पोहोचूनही त्यांच्यातला साधा, सामान्य माणूस त्यांनी अखेरच्या श्वासापर्यंत जपला.
मनोहर पर्रिकर यांचा जन्म १९५५ मध्ये गोव्यातील म्हापसा शहरात झाला. शालेय शिक्षण लोयोला हायस्कूलमध्ये घेतल्यानंतर, १९७८ मध्ये आयआयटी मुंबईतून इंजिनीअरिंगमध्ये पदवी संपादन केली. राजकारणात प्रवेश करण्यापूर्वी, त्यांनी राष्ट्रीय स्वयंसेवक संघात सक्रिय सदस्य म्हणून समाजसेवेची सुरुवात केली. संघाच्या उत्तर गोवा युनिटमध्ये त्यांनी काम केले आणि नंतर पूर्णवेळ राजकारणात पाऊल ठेवले.
१९९१ मध्ये पर्रिकर उत्तर गोवा लोकसभा मतदारसंघातून निवडणूक लढवली, पण काँग्रेसचे हरिश झांट्ये यांच्या विरोधात त्यांना पराभवाचा सामना करावा लागला. त्यानंतर १९९४ मध्ये त्यांनी पणजी विधानसभा मतदारसंघातून निवडणूक लढवली आणि मोठ्या फरकाने विजय मिळवला. गोव्याच्या राजकारणात अशी कामगिरी अन्य कोणत्याही नेत्याला साधता आली नव्हती. त्यानंतर, सलग चार वेळा ते या मतदारसंघातून निवडून आले.|
२००० मध्ये पर्रिकर गोव्यातील पहिले मुख्यमंत्री बनले. “सामान्य गोवेकरांचा मुख्यमंत्री” अशी त्यांची प्रतिमा तयार झाली. त्यांनी आपल्या साध्या जीवनशैलीतून जनतेचा विश्वास जिंकला. स्कूटीवरून मुख्यमंत्री कार्यालयात जात असताना त्यांचे अनेक फोटो व्हायरल झाले होते. मुख्यमंत्री झाल्यानंतरही, पर्रिकर शासकीय निवासस्थानी न राहता वडलोपार्जित घरातच राहिले, यामुळे त्यांनी साधेपणाचा एक आदर्श निर्माण केला.
गोव्यात भाजपची संघटनात्मक पातळी मजबूत करण्यासाठी पर्रिकर यांनी महत्वाची भूमिका निभावली. २००२ मध्ये गोवा विधानसभा बरखास्त केल्यानंतर, भाजपने निवडणुकीत विजय मिळवला आणि पर्रिकर पुन्हा मुख्यमंत्री झाले. २०१२ मध्ये त्यांनी जनसंपर्क यात्रा आयोजित केली, ज्यामुळे त्यांनी जनतेशी थेट संवाद साधला. याचा परिणाम म्हणून भाजपने २१ आमदारांसह पूर्ण बहुमताने सरकार स्थापन केले. पर्रिकर यांनी पेट्रोलवरील व्हॅट कमी करण्याचा महत्त्वाचा निर्णय घेतला, ज्यामुळे गोव्यात इतर राज्यांच्या तुलनेत ११ रुपयांनी स्वस्त पेट्रोल मिळू लागले. यामुळे देशभरात चर्चा झाली. यासोबतच, दयानंद सामाजिक सुरक्षा योजना, सायबरएज योजना आणि सीएम रोजगार योजना यांसारख्या महत्त्वपूर्ण योजनांच्या माध्यमातून त्यांनी गोव्यातील जनतेच्या हृदयावर राज्य केले.
नोव्हेंबर २०१४ मध्ये पंतप्रधान नरेंद्र मोदी यांनी पर्रिकर यांना गोव्यातून दिल्लीमध्ये पाचारण करून त्यांना देशाच्या संरक्षण मंत्रिपदाची जबाबदारी सोपवली. पर्रिकर यांच्या कार्यकाळात, २०१६ मध्ये उरी हल्ल्याचा प्रतिवाद म्हणून भारतीय जवानांनी पाकव्याप्त काश्मीरमध्ये सर्जिकल स्ट्राइक केला.
मार्च २०१७ मध्ये पर्रिकर यांनी संरक्षण मंत्रिपदाचा राजीनामा दिला आणि चौथ्यांदा गोव्याचे मुख्यमंत्री बनले. तथापि, फेब्रुवारी २०१८ मध्ये त्यांना स्वादुपिंडाचा कॅन्सर असल्याचे निदान झाले. या कठीण काळातही, पर्रिकर यांनी आपला धीर आणि सामर्थ्य कायम राखला.
त्यांचे अचानक निधन मनाला खूप वेदना देऊन गेले. त्यांची स्मृती सदैव आपल्या मनात राहते आणि ती आम्हाला योग्य कार्य करण्याची प्रेरणा देते. आज १३ डिसेंबरला त्यांच्याबद्दल काही शब्द लिहायची इच्छा झाली, इतकेच.
